Kristín Dýrfjörð – Kristín Dýrfjörð

Netfang dyr@unak.is

Um mig

Ég er fædd í Hafnarfirði 1961, en flutti sama ár norður á Sauðárkrók þar sem ég hóf skólagöngu, síðar flutti ég suður í Blesugróf þar sem ég ólst upp inn í miðri borg, en með móa á aðra hönd og Elliðaárdalinn á hina, staðir sem ég sæki enn í að ganga um og sækja innblástur. Sem barn hafði ég unun af sköpun, sem leiddi til þess að í nokkur ár fékk ég að sækja tíma fyrir unglinga í Myndlista- og handíðaskólanum hjá Jóni Reykdal. Það leiddi líka til þess að val mitt bæði í gagnfræðaskóla og Fjölbraut í Breiðholti snérist um skapandi greinar. Sköpun varð síðan förunautur minn í starfi í leikskólum næstu árin og áratugina. Ég er þeirrar skoðunar að grunnur sköpunar liggi í töfraheimi leiksins, í hugarheimi bernskunnar og á það bæði við um listamenn og vísindamenn. Að við sem manneskjur getum ekki lifað af án skapandi afla í umhverfi okkar.

Ég er leikskólakennari, og starfaði sem slík frá 1986 -1997 og 2010 (bæði sem leikskólakennari en lengst af sem leikskólastjóri). Í starfi mínu í leikskólanum lagði ég mikla áherslu á sköpun, hún hefur verið minn förunautur lengi.

Árið 1997 hóf ég störf við háskólann Akureyri, þar sem ég kenni m.a. um sköpun barna og leik. Rétt upp úr aldamótum bættist svo við námskeið sem ég hef kennt frá upphafi vísindasmiðja þar sem ég hef leitast við að tengja saman fjölbreytta sköpun við leik og náttúruvísindi. En ég kenni líka um sjálfbærni, og í þeim anda er garnið sem ég nota meira og minna keypt á nytjamörkuðum eða fengið frá vinum og vandamönnum.

Nafn sýningarinnar er tenging milli heimanna minna. Annars vegar er það lífstarfið sem tengist börnum og barnamenningu, og hins vegar er það óður til saumhringsins, en ég nota útsaumshringi við saumaskap og hringformið heillar.

Í grænni lautu,

þar geymi ég hringinn,

sem mér var gefin,

og hvar er hann nú?

Leikurinn, Í grænni lautu er gamall hring- og söngleikur barna.

Ég held líka út síðu sem tengist starfi mínu fyrir leikskóla www.laupur.is

Sýningar

Listasafn Samúels Jónssonar, Brautarholti, Selárdal 2023
Salon des Refusés Í Deiglunni 2019, 2021, 2023 (Sauma- og málverk).
Borgarbókasafn Reykjavíkur, Árbær ‚“Í grænni lautu“ febrúar – maí 2023
Safnasafnið – sumarsýning 2022
Bókasamlagið – Sumar 2022
Bókasafn Háskólans á Akureyri – október –desember 2022

Kristín Dýrfjörð 2. júní 2023

Á Siglufirði sést ekki til sólar frá því 15. nóvember ár hvert þar til 28. janúar árið eftir, vegna hinna tignarlegu fjalla sem umlykja fjörðin. Stundum er sólin farin fyrr, vegna veðurs og stundum sést hún ekki fyrr en kannski í febrúar vegna skýja og hríða. Undafarin ár hef ég gert smávegis af því að sauma minningar. Ég byrjaði á mynd um minningu mömmu og henni fylgir lítil saga. Í vetur var ég að spjalla við pabba (fæddur 1935) um hvað markar árið og líka um hvenær börn upplifa gleði. Hann sagði mér þá frá kærri minningu, þegar hann og vinir hann upplifðu sólina á eigin skinni í fyrsta sinn eftir langan vetur. Ég ákvað að sauma þessa minningu. Fyrst ætlaði ég að sauma hana sem hefðbundna mynd, en fannst ég ekki ná tilfinningunni nógu vel. Svo ég ákvað að sauma hana þrívíða, með ull, silki og bómullarbandi, en líka smávegis af perlum og palíettum til að fá glitrandi snjó.

Á myndinni eru þeir Biggi í Hlíð, Eiki Óla og Óli Níels og svo ákvað ég að hafa með barn á tunnuskíðum að fylgjast með þeim félögum.

Hljóðupptaka

Hér að neðan má heyra Birgi Dýrfjörð segja Sölva sonarsyni sínum söguna. Hljóðupptaka var gerð þann 1. júní 2023.